काठमाडौं, वैशाख १५ :
नेपाली खेलाडीले दुबई बुदोकान कप अन्तर्राष्ट्रिय कराते प्रतियोगितामा ६ स्वर्ण र २ रजत गरी ८ पदक जितेका छन् ।
नेपाल सितोरियो कराते संघका सचिवसमेत रहेका टिम प्रशिक्षक प्रेमलाल बमजनका अनुसार अन्जन तामाङ, लक्ष्मण बराल, उषाकुमारी थापा दास, सुशान्त तामाङ, देवराज श्रेष्ठ र विशाल केसीले स्वर्ण जिते ।
अप्रिल २६ तारिखदेखि भएको प्रतियोगितामा स्मिका विक र सावन लामाले रजत हात पारे । प्रतियोगितामा बूढानीलकण्ठ डोजोका खेलाडीले सहभागिता जनाएका हुन् ।
व्यवस्थापकमा बूढानीलकण्ठ नगरपालिका ३ का अध्यक्ष आकाश धिमाल र नेपाल कराते महासंघका सदस्य दिलीपराज भण्डारी, अर्का प्रशिक्षकमा अविनाश चौधरी तथा निर्णायकमा शान्ति तामाङ छन् । टोली भोलि (मंगलबार) स्वदेश फर्किंदै छ ।
