प्रेस काउन्सिल नेपालले विभिन्न सञ्चारमाध्यमका समाचार कक्षमै प्रवेश गरी सादा पोशाकका प्रहरीले पत्रकारलाई नियन्त्रणमा लिएको तथा पक्राउ गर्ने प्रयास गरेको घटनाप्रति गम्भीर ध्यानाकर्षण भएको जनाएको छ।
दुई दिन सार्वजनिक बिदा पर्नुअघि पक्राउको स्पष्ट कारण नखुलाई पत्रकारलाई नियन्त्रणमा लिइनु गम्भीर आपत्तिको विषय भएको काउन्सिलले जनाएको छ। काउन्सिलले नियन्त्रणमा लिइएका पत्रकारको अवस्था र पक्राउको कानुनी आधार तत्काल सार्वजनिक गर्न पनि माग गरेको छ।
सञ्चारमाध्यममा प्रकाशित समाचार सामग्रीप्रति असहमति वा पत्रकार आचारसंहितासम्बन्धी उजुरी भएमा त्यसको छानबिन, अनुगमन र निरूपण गर्ने कानुनी जिम्मेवारी प्रेस काउन्सिल नेपालको भएको उल्लेख गर्दै काउन्सिलले समाचारकै विषयमा सिधै प्रहरी परिचालन गर्नुको सट्टा स्थापित विधि र प्रक्रियाबाट समाधान खोज्न नेपाल सरकार, प्रहरी प्रशासन तथा सम्बद्ध सबै पक्षलाई आग्रह गरेको छ।
यसैबीच, राष्ट्रिय स्वतन्त्र पार्टी (रास्वपा)ले सञ्चारमाध्यमलाई त्रसित पार्ने र मनोवैज्ञानिक दबाबमा राख्ने प्रयास स्वीकार्य नहुने जनाएको छ।
रास्वपाले शुक्रबार विज्ञप्ति जारी गर्दै विभिन्न सञ्चारमाध्यममा कार्यरत पत्रकारहरूलाई प्रहरीले कार्यालयमै पुगेर नियन्त्रणमा लिएको तथा अन्य पत्रकारको खोजी जारी राखेको समाचारप्रति गम्भीर ध्यानाकर्षण भएको जनाएको छ। समाचार लेखेकै आधारमा पत्रकारहरूलाई पक्राउ गरिएको तथा केही पत्रकारको खोजी भइरहेको समाचारप्रति आपत्ति जनाएको छ।
