रुकुम-पश्चिमको बाफिकोट गाउँपालिका–४ स्थित तिल्चा खोलाले मोटरसाइकलसहित आज दुई जनालाई बगाएको छ ।
खोलाले बगाएका मोटरसाइकल पछाडि सवार १८ वर्षीय प्रवीण बस्नेतको सकुशल उद्धार गरिएको छ भने मोटरसाइकल चालकको खोजी कार्य भइरहेको जिल्ला प्रहरी कार्यालय रुकुम पश्चिमका सूचना अधिकारी एवं प्रहरी निरीक्षक झवीन्द्र परियारले जानकारी दिए ।
उनका अनुसार खलङ्गाबाट कुनाखेत हुँदै स्यार्पुतालतर्फ जाँदै गरेको रा६प १६१८ नम्बरको मोटरसाइकल तिल्चा खोला पार गर्ने क्रममा एक्कासी चिप्लिएर खोलामा बगेको थियो । मुसिकोट नगरपालिका-४ सोलाबाङ निवासी १८ वर्षीय प्रशान्त सन्यासीले मोटरसाइकल चलाएका जनाउँदै मोटरसाइकलको पछाडि रामेछापको गोकुलगङ्गा गाउँपालिका-१ का १८ वर्षीय प्रवीण बस्नेत सवार रहेका उनले बताए।
मोटरसाइकल चिप्लिएपछि चालक सन्यासी र पछाडि सवार बस्नेतलाई खोलाले बगाएको थियो । बस्नेतलाई खोलाको बीचमा रहेको ढुङ्गामा अड्किएको अवस्थामा फेला परेपछि सकुशल उद्धार गरिएको प्रहरी निरीक्षक परियारले उल्लेख गरे । मोटरसाइकलसहित चालक प्रशान्तको खोजी भइरहेको जिल्ला प्रहरी कार्यालय रुकुम-पश्चिमले जनाएको छ ।
