एक हजार २८२ मत खस्यो,राति १२ बजेभित्र मतदान केन्द्रमा प्रवेश गरेका प्रतिनिधिलाई अबेरसम्म मतदान गर्न पाउने

नेपाल कम्युनिष्ट पार्टी (एमाले) को ११औँ राष्ट्रिय महाधिवेशनको नयाँ नेतृत्वका लागि भएको मतदानमा एक हजार २८२ मत खसेको छ ।

महाधिवेशनस्थल भृकुटीमण्डपमा जारी भएको मतदानमा १० बजेसम्म एक हजार २८२ जनाले मतदान गरेको एमाले केन्द्रीय निर्वाचन आयोग उपाध्यक्ष सानुराज पोखरेलले जानकारी दिए । बिहान ९:१२ बजेदेखि मतदान सुरू भएकामा मतदान गर्नका लागि सरदर एक जनालाई २५ देखि ३० मिनेट लाग्ने गरेको छ ।

उनले राति १२ बजेभित्र मतदान केन्द्रमा प्रवेश गरेका प्रतिनिधिलाई  अबेरसम्म मतदान गर्न पाउने व्यवस्था गरिने बताए । निर्वाचन आयोग उपाध्यक्ष पोखरेलले हालको अवस्थाअनुसार भोलि बिहान ८ बजेसम्म मतदान हुने अनुमान रहेको बताए । “हाल मत हाल्ने लाग्ने गरेको समयअनुसार भोलि बिहान ८ बजेसम्म मतदान हुने देखिन्छ”, उनले भने, “एक जनालाई सरदर २५ देखि ४० मिनेटसम्म मतदान गर्न समय लागेको छ ।”

आयोगले लाइनमा रहेका मतदातालाई सहजताका लागि टोकन वितरण गरेको छ । टोकन लिएर बसेकालाई आयोगले बोलाएपछि मतदान गर्न जाने सुविधा छ ।

एमालेमा ३०१ केन्द्रीय सदस्यीय समितिका लागि करिब ६४२ जनाको उम्मेदवारी  परेको छ । मतदानमा दुई हजार २६३ मतदाता सहभागी छन् । हाल मतदानका लागि ८० वटा विद्युतीय भोटिङ मेसिन प्रयोगमा ल्याइएका  छन् ।

मतदान सकिएको दुई घण्टामा परिमाण सार्वजनिक हुने आयोगका आयोगका उपाध्यक्ष पोखरेलले बताए ।