एमालेको मतदानमा ढिलाई, राति ८ बज्न सक्छ

नेकपा एमालेको नयाँ नेतृत्व चयनका लागि अझै मतदान सुरु हुन सकेको छैन । मध्याह्न १२ बजेदेखि मतदानको समय तोकेकोमा समय धकेलिएर साँझ ४ बजेदेखि सुरु हुने भनिएको थियो तर, अझै समय लाग्ने प्राविधिक पक्षले जनाएको छ ।

हरेक उम्मेदवारको फोटोको कोडिङ गरेर ठिक्क पारेको अवस्थामा नाम तलमाथि परेकाले मिलाउँदा पुन: नयाँ कोडिङ गर्नु परेकाले ढिलाई भएको बताइएको छ । प्राविधिक लक्ष्मण रिमालले रातिको ८ बजेदेखि मात्र मतदान सुरु हुन सक्ने बताएका छन् । 

यसअघिको १० औं महाधिवेशनमा जस्तै विद्युतीय मतदान गर्न लाग्दा प्राविधिक समस्या देखिएको हो । अध्यक्ष पदका लागि केपी शर्मा ओली र ईश्वर पोखरेल  प्यानलसहित प्रतिस्पर्धामा छन् ।