उपराष्ट्रपति रामसहाय यादवले धर्मभन्दा माथि उठेर देश र जनताका निम्ति काम गर्न आवश्यक भएको बताउनुभएको छ ।
आज पश्चिम नवलपरासीमा १४९९ औँ मोहम्मद जयन्तीका अवसरमा आयोजित राष्ट्रिय एकता एवं पैगामे अमन सम्मेलनमा उहाँले धर्मभन्दा माथि उठेर जनता र देशका लागि काम गर्नुपर्नेमा जोड दिनुभयो ।
उहाँले समाजिक कार्य र धार्मिक उत्सवहरूमा सक्रिय सहभागिता र अन्तरघुलन बढाउन जरुरी भएको बताउनुभयो । कुनै पनि धर्मको मूलमन्त्र मानवता, प्रेम, सद्भाव, सहिष्णुता र सहयोग अभिवृद्धि गर्नु रहेको उपराष्ट्रपति यादवले स्मरण गराउनुभयो ।
देशमा शान्ति तथा अमनचयन कायम गर्न दया, करुणा, इमान्दारी, परोपकारी भाव एवं व्यवहार आवश्यक रहेको उहाँको भनाई छ ।
अनेकतामा एकता नेपालको विशेषता भएको चर्चा गर्दै यो विविधतालाई अझ सुदृढ बनाउनुपर्नेमा उहाँले जोड दिनुभयो ।
देशको चौतर्फी विकासका निम्ति हामीबीच एकता हुन जरुरी रहेको उहाँले बताउनुभयो ।
विभिन्न धर्मका धर्मगुरुहरूको उपस्थितिमा भएको उक्त कार्यक्रममा उपराष्ट्रपति यादव सहित सबै धर्मगुरुहरूले शान्तिका प्रतीक परेवाहरू उडाउनुभएको थियो ।
