काठमाण्डौँ , भदौ २५ :
काठमाडौँबाट सुर्खेतका लागि उडेको श्री एयरलाइन्सको विमानमा प्राविधिक समस्या देखिएपछि तत्काल त्रिभुवन अन्तर्राष्ट्रिय विमानस्थलमै ‘डाइभर्ट’ गराइएको जनाइएको छ ।
विमानस्थलबाट उडेको केही मिनेटमा विमानको ‘इण्डिकेटर’ मा समस्या देखिएपछि विमानलाई ‘डाइभर्र्ट’ गरिएको हो ।
विमानस्थलका प्रवक्ता रिञ्जी शेर्पाले श्री एयरलाइन्सको विमान आकस्मिक अवतरण नभई ‘डाइभर्ट’ भएको बताउनुभयो ।
उहाँले ह्विल स्टेरिङ लक भएकाले विमान बीचबाटै फर्काइएको र केहि समयपछि अहिले विमानस्थलबाट हुने अन्य उडान नियमित सञ्चालन भइरहेको जानकारी दिनुभयो ।
श्री एयरलाइन्सका व्यवस्थापक अनिल मानन्धरले प्राविधिक समस्या देखिएको उक्त विमानका यात्रुलाई वैकल्पिक उडान मार्फत गन्तव्य पुर्याइएको जानकारी दिनुभयो।
