सिराहा, चैत १६ :
सिराहामा महायज्ञका लागि दलितको घर भत्काएको आरोपमा पक्राउ परेका औरही गाउँपालिका अध्यक्ष शिवजी यादव र पूर्ववडाध्यक्ष दिलीप यादव धरौटीमा रिहा भएका छन् ।
शुक्रबार सिराहा जिल्ला अदालतका न्यायाधीश विदुर काफ्लेको इजलासको आदेशमा जनही एक लाख रुपैयाँ धरौटी बुझाएर उनीहरु रिहा भएका हुन् ।
जातीय विभेद तथा छुवाछुतसम्बन्धी कसुरमा यही चैत ८ गते पक्राउ परेका उनीहरुविरुद्धको मुद्दामा शुक्रबार अदालतमा थुनछेक बहस भएको थियो ।
अदालतले उनीहरूलाई वैशाख १९ मा पुनः हाजिर हुन आदेश दिएको छ ।
घटनाको मुख्य योजनाकार मानिएका महायज्ञका मूल पुजारी बजरंगी बाबा भने अझै फरार रहेको प्रहरीले जनाएको छ ।
गत फागुन १० मा औरही- ५ का दीपक मल्लिक (डोम) को घर महायज्ञका नाममा डोजर लगाएर भत्काइएको थियो ।
