काठमाडौं, फागुन २६ :
काठमाडौँ उपत्यका विश्वको पाँचौं प्रदूषित सहरको सूचीमा परेको छ । आजको ‘एयर क्वालिटी इन्डेक्स’ अनुसार काठमाडौँ विश्वका पाँचौं प्रदूषित सहरको सूचीमा परेको हो ।
यहाँको वायु प्रदूषणको स्तर १६३ एक्यूआईमा पुगेको छ । पर्याप्त पानी नपर्दा काठमाडौंको वायु प्रदूषण बढेको जनाइएको छ ।
पर्याप्त वर्षा नहुँदा आकाशमा बादलको घेरो छाएको छ । वायु प्रदूषण पनि बढेको छ । मौसमविद् विनु महर्जनका अनुसार, स्थानीय वायुको प्रभाव र पश्चिमी न्यून चापीय प्रणालीका कारण वर्षा हुन सकेको छैन ।
‘मुलुकका केही भागमा हिमपात र हल्का वर्षा भएको छ, तर प्रदूषण हट्ने गरी वर्षा भएको छैन,’ उनले भनिन्, ‘अझै तीन दिन यस्तै मौसम रहने देखिन्छ ।’ आकाशमा धुम्म बादल लाग्दा मौसम पनि धुमिल देखिनुका साथै केही चिसो पनि बढेको महसुस भएको छ ।
