इलोन मस्कको विभागमाथि आर्थिक तथ्यांक पहुँचमाथि रोक

अमेरिकाको अदालती कागजातहरू अनुसार, एक संघीय न्यायाधीशले इलोन मस्कको सरकारी दक्षता विभागलाई ट्रेजरी विभागको रेकर्डमा राखिएका लाखौं अमेरिकीको व्यक्तिगत आर्थिक तथ्यांक (वित्त डेटा) पहुँचबाट रोक लगाएका छन् ।

अमेरिकी जिल्ला न्यायाधीश पल ए. एन्जेलमेयरले शनिबार यस सम्बन्धमा प्रारम्भिक आदेश जारी गरेका हुन् । यसमा मस्क र उनको टोलीलाई तथ्यांक भण्डारणको कुनै पनि प्रतिलिपि निजी रुपमा प्रयोग गरेको भए तत्काल नष्ट गर्न आदेश दिइएको थियो ।

ट्रम्प प्रशासनले मस्कको नेतृत्वमा सञ्चालित सरकारी दक्षता विभागलाई ट्रेजरी विभागसँग सम्बन्धित रेकर्डहरू (तथ्यांकहरु) माथि पहुँचको अनुमति दिएको थियो । मस्कको विभागले ‘लागत कटौती’ मा काम गरिरहेको छ ।

यस मुद्दामा १९ राज्यका महान्यायाधिवक्ताहरूले ट्रम्प प्रशासनविरुद्ध मुद्दा दायर गरेका थिए, त्यसपछि न्यायाधीशले यो आदेश दिएका हुन् ।

न्यायाधीशले मस्क एक ‘विशेष सरकारी कर्मचारी’ भएको र ‘सरकारी दक्षता विभाग’ आधिकारिक सरकारी विभाग नभएको तर्क गरेका छन् । यस्तो अवस्थामा उनको कोष विभागमा पहुँच संघीय कानुनको उल्लंघन रहेको पनि न्यायाधीशले बताएका छन् ।

यद्यपि, एक्समा एक पोस्टमा इलोन मस्कले यो निर्णयबारे लेखेका छन कि- ‘यो विल्कुल बुद्धिमानी काम होइन ।’ -बीबीसी