जीविकोपार्जनसँग पर्यटनलाई जोड्न तनहुँमा चियाखेती सुरु 

जीविकोपार्जनसँग पर्यटनलाई जोड्ने उद्देश्यले तनहुँको ऋषिङ र आँबुखैरेनी गाउँपालिकाले चियाखेती सुरु गरेका छन् । 

ऋषिङ गाउँपालिकाले वडा नं ३ स्थित दुवुङकोटमा बिहीबार एक हजार पाँच सय चियाको बिरुवा रोपेको छ भने आँबुखैरेनी गाउँपालिकाले आँबुखैरेनी- ६ हिलेखर्कस्थित बतासे डाँडाको १५ रोपनी क्षेत्रफलमा चार हजार दुई सय बेर्ना सारेको छ ।

ऋषिङ गाउँपालिकाका अध्यक्ष राजेन्द्रकृष्ण श्रेष्ठले यो वर्ष परीक्षणका रुपमा रोपिएका बिरुवाबाट अपेक्षाअनुसार उत्पादन भएमा भविष्यमा त्यसलाई विस्तार गरिने बताउनुभयो । हाल दुवुङकोटको एक सय रोपनी जग्गामध्ये १२ रोपनीमा बिरुवा लगाइएको हो । 

स्थानीयवासीलाई रोजगारीसँग जोड्दै पर्यटन प्रवर्द्धन गर्ने उद्देश्यले परीक्षणका रुपमा चियाखेती गरिएको उहाँले बताउनुभयो । चिया बगानका माध्यमबाट दुवुङकोटलाई पर्यटकीयस्थलका रुपमा पनि विकास गर्न सकिने अध्यक्ष श्रेष्ठको भनाई छ । 

ऋषिङ गाउँपालिका- ३ का वडाध्यक्ष भीमबहादुर थापाले दुवुङकोटमा ‘भ्यूटावर’ पनि रहेकाले आन्तरिक पर्यटकका निम्ति प्रमुख गन्तव्यका रूपमा विकास गर्न चिया बगान पनि बनाउने प्रयासमा जुटेको बताउनुभयो ।