त्रिदेशीय महिला टी- ट्वेन्टी : थाइल्यान्डसँग नेदरल्यान्ड्स पराजित

काठमाडौँमा जारी त्रिकोणात्मक सिरिज अन्तर्गत आज भएको दोस्रो खेलमा थाइल्यान्डसँग  नेदरल्यान्ड्स पराजित भएको छ । 

कीर्तिपुरस्थित त्रिवि मैदानमा आज भएको खेलमा थाइल्यान्डले नेदरल्यान्ड्सलाई ८ विकेटले पराजित गरेको हो । 

नेदरल्यान्ड्सले दिएको १२३ रनको लक्ष्य पछ्याएको  थाइल्यान्डले १८ ओभरमा दुई विकेट गुमाएर पूरा गर्यो । थाइल्यान्डका लागि नान्नापत कोन्चारोइनकाइले ५० बलमा पाँच चौका प्रहार गर्दै नटआउट ५६ रन जोडिन् ।

त्यसअघि टस जितेर पहिले ब्याटिङ गरेको नेदरल्यान्ड्सले निर्धारित २० ओभरमा छ विकेटको क्षतिमा १२२ रनको योगफल बनाएको थियो । नेदरल्यान्ड्सका लागि कप्तान बाकेटे डी लिडेले ५२ रन जोडेकी थिइन् ।

त्यस्तै  आरिस विलिङले २८ रन जोडिन् । बलिङमा थाइल्यान्डकी पुत्थावोङले दुई विकेट लिइन् । सिरिजको तेस्रो खेलमा भोलि शनिबार नेपाल र थाइल्यान्डबीच प्रतिस्पर्धा हुनेछ ।