काठमाडौं, माघ १५ :
पूर्वराष्ट्रपति विद्यादेवी भण्डारीले राजनीतिमा फर्कने इच्छा देखाएकी छन् । तर, उनले आफू पार्टीको राजनीतिमा सक्रिय हुने समय आइनसकेको बताइन् ।
विराटनगर विमानस्थलमा सोमबार सञ्चारकर्मीहरूसँग कुरा गर्दै पूर्वराष्ट्रपति भण्डारीले राजनीतिप्रति आफ्नो गहिरो अभिरुचि रहेको पनि स्पष्ट पारिन् ।
आफ्नो राजनीतिक सक्रियताबारे यदाकदा छलफल हुने गरे पनि आफू त्यो चरणमा प्रवेश नगरिसकेको भन्दै उनले नेकपा एमालेको सक्रिय राजनीतिमा फर्कने संकेत गरिन् ।
ओलीपछिको नेतृत्व सम्हाल्ने गरी भण्डारी पुनः एमालेमा फर्कन लागेको भन्ने राजनीतिक वृत्तमा चर्चा चलिरहँदा त्यसबारेमा प्रस्ट पारेकी हुन् । राष्ट्रपतिमा चुनिनुअघि भण्डारी एमालेमा उपाध्यक्ष थिइन् । कार्यकाल सकिनेबित्तिकै उनको राजनीतिक जीवनको बारेमा चासो र चर्चा हुन थालेको थियो ।
