घण्टौं लामो गतिरोधपछि दक्षिण कोरियाली राष्ट्रपति पक्राउ

दक्षिण कोरियाका राष्ट्रपति युन सुक योललाई  सियोलस्थित उनकै निवासबाट पक्राउ गरिएको छ । 

दक्षिण कोरियाली अनुसन्धानकर्ताले आज बिहान उनलाई पक्राउ गरेका हुन् ।अहिले  भ्रष्टाचार अनुसन्धान कार्यालय सीआईओमा उनीसंग सोधपुछ भईरहेको समाचार छ ।  

गत डिसेम्बरमा सैनिक शासन लागू गर्ने अल्पकालीन प्रयासपछि विद्रोहको अभियोगमा युनमाथि अनुसन्धान भइरहेको छ ।

अधिकारीहरू र उनका सुरक्षा कर्मचारीहरू र समर्थकहरू बीच एक घण्टा लामो गतिरोधपछि आज  गिरफ्तारी गरिएको हो। युन हप्तौंदेखि आफ्नै निवासमा थिए ।

अनुसन्धानकर्ताहरूले यसै महिनाको सुरुमा पनि उनलाई पक्राउ गर्ने प्रयास गरेका थिए  तर असफल भएका थिए ।

उनलाई पदबाट हटाउने कि नहटाउने भन्ने निर्णय गर्ने युनको महाभियोगको सुनुवाइ हिजोबाट सुरु भएको छ ।  तर उनको अनुपस्थितिका कारण चार मिनेटमै टुंगिएको थियो ।