एक करोड बढीको सुन, चाँदी र विदेशी मुद्रासहित तीन जना पक्राउ

कैलालीको भजनी नगरपालिका- ५ स्थित कौवाखेडा सीमा  क्षेत्रबाट एक करोडभन्दा बढीको सुन, चाँदी र विदेशी मुद्रासहित तीन जना पक्राउ परेका छन् । 

सशस्त्र प्रहरी बलका सहप्रवक्ता प्रहरी नायब उपरीक्षक शैलेन्द्र थापाले सुर्खेतको चौकुनी गाउँपालिका- १० का ३६ वर्षीय महेन्द्रबहादुर शाही सोही जिल्लाको वीरेन्द्रनगर नगरपालिका- १ का ३१ वर्षीय हर्कबहादुर बिक र पञ्चपुरी नगरपालिका- ११ का ३२ वर्षीय महेश सुनारलाई गए राति पक्राउ गरिएको जानकारी दिनुभयो । 

भारतबाट आएका उनीहरूबाट ८० लाख ७९ हजार पाँच सय ६१ बराबरको छ सय २० ग्राम  सुन, १५ लाख २८ हजार चार सय ६० बराबरको आठ किलो नौ सय १४ ग्राम चाँदी,  विभिन्न दरका छ लाख ११ हजार छ सय २५  भारतीय मुद्रा, साउदी रियाल, विभिन्न  किसिमका चार थान मोबाइल सेट र चाँदीका लेप लगाएका भाँडा पनि बरामद भएका छन् ।