इलाम गोल्डकपको तयारी पूरा, विजेताले उपाधि सहित नगद १० लाख पाउने

दश लाख पुरस्कार राशिको इलाम गोल्डकपको तयारी पूरा भएको छ । 

रेडहर्स फुटबल क्लबको आयोजनामा ठूलो टुँडिखेलमा भोलिदेखि यही मङ्सिर २९ गतेसम्म हुने प्रतियोगिताका सम्पूर्ण तयारी पूरा भएको क्लबका सचिव प्रकाश घिमिरेले बताउनुभयो 

१२ हजार  दर्शक अटाउने प्यारापिट, मञ्चलगायतका सम्पूर्ण तयारी पूरा भएको तथा प्रतियोगितामा भाग लिन डिफेन्डिङ च्याम्पियन न्युरोड टिम (एनआरटी) र सङ्कटा क्लब इलाम आइसकेका छन् । 

प्रतियोगितामा भिड्ने त्रिभुवन आर्मी, चर्च ब्वाइज, झापाको रेड स्टार, मच्छिन्द्र, दार्जिलिङको जिटिएका खेलाडी आउन बाँकी छ । स्पर्धामा आयोजक रेड हर्स क्लब पनि सहभागी हुनेछ । 

क्लबले गत वर्ष पहिलो पटक प्रतियोगिता आयोजना गरेको थियो । विजेताले उपाधि सहित नगद रु १० लाख  र उपविजेताले पाँच लाख पुरस्कार पाउनेछन् । विभिन्न विधाका उत्कृष्ट खेलाडीलाई २५ हजार नगद प्रदान गरिनेछ ।