विभिन्न आपराधिक क्रियाकलापमा संलग्न ७ जना काठमाडौँबाट पक्राउ परेका छन् ।
काठमाडौँ उपत्यका अपराध अनुसन्धान कार्यालयले डरत्रास देखाएर रकम असुल गर्ने, अनलाइन र वैदेशिक रोजगारीमा पठाइदिने भन्दै ठगी गर्ने तथा बैङ्किङ कसुरमा फरार प्रतिवादीलाई पक्राउ गरेको हो ।
अनलाइनमार्फत ठगी गर्ने कार्यमा संलग्न रहेको अभियोगमा काठमाडौँ महानगरपालिका- ३२ ठेगाना भएका ३७ वर्षीय राजेश श्रेष्ठ हाँडीगाउँबाट पक्राउ परेका छन् ।
उनले सामाजिक सञ्जालमा सम्पर्क गरी विभिन्न बहानामा सात लाख ७५ हजार विभिन्न व्यक्तिको नाममा रहेको बैंक खातामा पठाउन लगाई ठगी गरेको खुल्न आएको प्रहरीले जनाएको छ ।
यसैगरी आकर्षक तलबको प्रलोभनमा पारी विभिन्न मुलुकमा वैदेशिक रोजगारमा पठाइदिन्छु भन्दै रकम ठगी गरेको अभियोगमा चितवन कालिका नगरपालिका- ७ ठेगाना भएकी २१ वर्षीया रचना परियार र डोटी बडीकेदार गाउँपालिका- २ घर भई काठमाडौँ तारकेश्वर नगरपालिका- १० बस्ने २७ वर्षीय प्रकाशबहादुर रोक्का मगर पक्राउ परेका छन् ।
रचनाले हङ्गेरी पठाइदिन्छु भन्दै दुई जनाबाट १८ लाख र प्रकाशले माल्टा पठाइदिन्छु भन्दै एकजनाबाट एक लाख लिई सम्पर्कविहीन भएका थिए । रचनालाई काठमाडौँ महानगरपालिका- १२ बाट र प्रकाशलाई टोखा नगरपालिका- ९ बाट पक्राउ गरेको हो ।
उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल काठमाडौँ पठाइएको केन्द्रीय प्रहरी प्रवक्ता प्रहरी नायब महानिरीक्षक दानबहादुर कार्कीले बताउनुभयो ।
त्यस्तै नक्कली फेसबुक आइडी बनाएर वैदेशिक रोजगारीमा पठाइदिन्छु भनी ठगीमा संलग्न रहेको अभियोगमा पर्साको वीरगन्ज महानगरपालिका-३१ घर भई काठमाडौँ तारकेश्वर नगरपालिका- ७ बस्ने २१ वर्षीय सुरज पौडेललाई पनि प्रहरीले पक्राउ गरेको छ ।
उनले फेसबुकबाट दुबईमा वैदेशिक रोजगारका लागि सुवर्ण अवसर रहेको भन्दै भिजिट भिसामा दुबईमा आएर काम गर्न मिल्छ भनी विज्ञापन राखेर पीडितसँग दुई लाख १५ हजार ठगेको प्रहरीले जनाएको छ ।
साथै बैङ्किङ कसुर मुद्दाका फरार तीनजना प्रतिवादी पक्राउ परेका छन् । प्रहरीले बेनी नगरपालिका- ९ की ३९ वर्षीया विष्णुमाया केसी, काठमाडौँ महानगरपालिका- १५ का ५६ वर्षीय बालकृष्ण महर्जन र भक्तपुर नगरपालिका- ७ का ५२ वर्षीय राजेन्द्र तुईतुईलाई काठमाडौँको विभिन्न स्थानबाट पक्राउ गरेको प्रहरी नायब महानिरीक्षक कार्कीले जानकारी दिए ।
केसीले पीडितलाई खातामा पर्याप्त रकम मौज्दात नभएको एक करोड ५० लाखको चेक दिई फरार भएकी प्रहरीले जनाएको छ । महर्जन बैंकिङ कसुर मुद्दामा उच्च अदालत पाटनले अघिल्लो जेठ २९ गते पाँच दिन कैद, बिगो १६ लाख र ६४ हजार क्षतिपूर्तिबापत पीडित राहत कोषमा जम्मा गराउने ठहर गरेकामा उनी फरार भएका थिए ।
