बिपी राजमार्गको धुलिखेल- वर्षेखोला सडकखण्ड रातिको समयमा बन्द हुने

बिपी राजमार्ग अन्तर्गत काभ्रेको धुलिखेलदेखि वर्षेखोलासम्मको सडक खण्ड रातिको समयमा बन्द हुने भएको छ ।

गत असोज १० देखि १२ सम्म परेको अविरल वर्षाका कारण क्षति पुगेको उक्त सडक खण्ड स्तरोन्नति गर्नका लागि रातिको समयमा बन्द गर्न लागिएको सडक डिभिजन कार्यालय भक्तपुरले जनाएको छ ।

सडक डिभिजन कार्यालय भक्तपुरले सूचना जारी गर्दै राति ९ बजेदेखि बिहान ४ बजेसम्म सडक बन्द रहने जानकारी गराएको हो।

धुलिखेलदेखि वर्षेखोलासम्मको सडक खण्ड (चौकी डाँडा, नार्के बजार र कालढुङ्गादेखि माम्तिखोला सम्म) डाइभर्सनको काम भइरहेकोले रातिको समयमा सडक बन्द रहने सूचनामा उल्लेख छ ।