सैपुमा रामेछापकै सर्वाधिक पुरस्कार राशि रहेको भलिबल प्रतियोगिता आजबाट 

रामेछापको सैपुमा आजबाट  ‘नमुनादीप कप’ भलिबल प्रतियोगिता शुरु भएको छ। 

प्रतियोगिताको आज जलस्रोत तथा सिँचाइ राज्यमन्त्री पूर्णबहादुर तामाङ (कान्छाराम) ले उद्‌घाटन गर्दै हुनुहुन्छ ।

नमुनादीप युवा क्लबले पालिकास्तरीय खुला पुरुष भलिबल प्रतियोगिता आयोजना गरेको अध्यक्ष राजन बस्नेतले जानकारी दिनुभयो ।

लिखु तामाकोशी गाउँपालिका- २ सैपुस्थित अरुणोदय माविको प्राङ्गणमा हुने प्रतियोगिताका लागि रामेछाप, सिन्धुली, दोलखा र ओखलढुङ्गाका स्थानीय तहबाट खेलाडीहरूको सहभागिता रहेको छ ।

प्रतियोगिताको विजेता टोलीले ट्रफीसहित १ लाख १ हजार ५ सय, उपविजेता टोलीले ७५ हजार ५ सय र तेस्रो हुने टोलीले ५० हजार ५ सय प्राप्त गर्नेछन्। 

क्लबले २०६५ साल यता नियमित रूपमा आयोजना गर्दै आइरहेको नमुनादीप कपको यो दशौं संस्करण हो । 

क्लबले भलिबल प्रतियोगिताको साथमा डोरी तान (टग अफ वार) प्रतियोगिता, निःशुल्क स्वास्थ्य शिविर, बृहत् सांस्कृतिक कार्यक्रमको आयोजना गर्ने छ।

टग अफ वारमा ६ सय केजी समूह सम्मका ९- ९ जना खेलाडी रहनेछन्। विजेताले २० हजार नगद र उपविजेता टोलीले १० हजार नगद पुरस्कार पाउने छन्। यसैगरी भोली सोमबार निशुल्क स्वास्थ्य शिविर सञ्चालन हुने क्लबले जनाएको छ ।

आगामी मङ्गलबार सकिने प्रतियोगिताको समापन नेकपा एमालेका बागमती प्रदेश सदस्य एवम् समाजसेवी रत्न गौतमले गर्ने कार्यक्रम रहेको छ ।