सोलुखुम्बुमा भएको हेलिकप्टर दुर्घटनाको छानबिन गर्न समिति गठन

नेपाल नागरिक उड्डयन प्राधिकरणले सोलुखुम्बुको फेरिचेमा दुई हेलिकप्टर जुधेको घटनाको छानबिन गर्न समिति गठन गरेको छ । प्राधिकरणका निर्देशक प्रभाकरचन्द्र मल्लिकको संयोजकत्वमा पाइलट तथा वायुयान इन्जिनियर सम्मिलित ५ सदस्यीय छानबिन समिति गठन गरिएको हो ।

समितिलाई दुर्घटनाको कारण अध्ययन र विश्लेषण गरी भविष्यमा यस्ता दुर्घटना पुनरावृत्ति रोक्न आवश्यक सुझाव सहित प्रतिवेदन पेस गर्ने जिम्मेवारी दिइएको छ ।

मंगलबार फेरिचेमा एयर डाइनेस्टीको दर्ता नम्बर ‘९एन-एओडी’ र फिस्टेल एयरको ‘९एन-एजेआर’ हेलिकप्टर एकापसमा ठोक्किएर भएको दुर्घटनामा एक भारतीय नागरिकको मृत्यु भएको थियो । घटनामा दुई पाइलट र एक यात्रु घाइते भएका थिए ।