हुम्लाको लिमिका उच्च पाटनमा अज्ञात अवस्थामा रहेका चौँरी गाईसहित दुई सय पशुको उद्धार

हुम्लाको नाम्खा गाउँपालिका–६ स्थित हिमालपारिको गाउँ लिमीका उच्च पाटनमा चरनका लागि लगिएका चौँरी गाईसहित दुई सय पशुको झण्डै एक महिनापछि उद्धार गरिएको छ ।

असोज ९ देखि ११ गतेसम्म परेको भारी हिमपातका कारण उच्च पाटनमा अज्ञात अवस्थामा रहेको पशुहरुको उद्धार गरिएको हो  ।

बाक्लो हिउँ जमेका कारण खोजी तथा उद्धारमा जान समेत कठिनाइ भएको थियो । उद्धार गरिएका पशुमा १०० चौँरी गाई, ५० घोडा तथा ५० जुमा र झोपा छन् ।

लामो समयदेखि सम्पर्कविहीन रहेका पशुलाई निङ खोला, साक्या खोला, गेउ खोला र लाप्चा क्षेत्रका उच्च पाटनबाट कठिन प्रयासपछि उद्धार गरिएको हो । बाक्लो हिमपात र प्रतिकूल मौसमका कारण उच्च पाटनमा रहेका पशुको खोजी गर्न समस्या भएको थियो ।

लिमीका बासिन्दाले बर्सेनि हिमपातका कारण सास्ती खेप्दै आएका छन् । नारा र न्यालु लेकमा हिउँ जमेर सडक अवरुद्ध हुँदा लिमीबाट सदरमुकाम सिमकोट पुग्न समेत कठिन हुने गरेको स्थानीयको गुनासो छ ।

सडक अवरुद्ध हुँदा लिमीका बासिन्दा सदरमुकामबाट टाढा रहेकाले आवतजावतमा समेत समस्या भएको छ ।