वेब प्रविधि पिएचपिमा विश्वव्यापी सुरक्षा जोखिम देखिएपछि नेपाल राष्ट्र बैंकको सेवा बन्द

वेब प्रविधि पिएचपिमा विश्वव्यापी रूपमा गम्भीर सुरक्षा जोखिम देखिएपछि नेपाल राष्ट्र बैंकले आफ्नो वेबसाइट लगायतका सेवा अस्थायी रूपमा बन्द गरेको छ ।

राष्ट्र बैंकले आज सूचना जारी गर्दै सो जानकारी गराएको छ । सुरक्षा जोखिमलाई मध्यनजर गरी सेवा अस्थायी रूपमा बन्द गरिएको बैकले जनाएको छ । यसबाट बैंकिङ तथा वित्तीय क्षेत्रका सरोकारवाला निकाय र सर्वसाधारणमा पर्न गएको असुविधा प्रति बैंकले क्षमायाचना समेत गरेको छ ।

सेवा बन्द रहेको अवधिमा राष्ट्र बैंकसँग सम्बन्धित अत्यावश्यक सूचना तथा जानकारीका लागि बैंकका आधिकारिक सामाजिक सञ्जालमार्फत जानकारी लिन आग्रह गरिएको छ ।

राष्ट्र बैंकले पिएचपिमा देखिएको सुरक्षा जोखिमलाई ध्यानमा राख्दै आवश्यक सतर्कता अपनाउन बैंक तथा वित्तीय संस्था, भुक्तानी प्रणाली सञ्चालक (पीएसओ), भुक्तानी सेवा प्रदायक (पीएसपी) र विप्रेषण कम्पनीहरूलाई पनि अपिल गरेको छ ।

साथै सर्भरमा प्रयोग भइरहेका प्रणालीलाई सबलीकरण गर्न र नियमित सुरक्षा निगरानी बढाउन सम्बन्धित संस्थाहरूलाई आग्रह गरिएको छ ।

राष्ट्र बैंकले आज जारी गरेको सूचनामा सुरक्षा जोखिमलाई केन्द्रित गर्दै आवश्यक सावधानी अपनाउन सम्बन्धित सबै निकायको ध्यानाकर्षण गराएको छ ।