नेपाल आज घरेलु टोली ओमानसँग भिड्दै

ओमानमा जारी आईसीसी क्रिकेट विश्वकप लिग २ अन्तर्गत ओडीआई शृङ्खलाको अन्तिम खेलमा नेपाल आज घरेलु टोली ओमानसँग भिड्दैछ ।

अल अमेरत क्रिकेट ग्राउन्ड मिनिस्ट्री टर्फ १ मा हुने खेल बिहान सवा ११ बजेदेखि सुरु हुनेछ । लिग २ को अंक तालिकामा शीर्ष ६ मा रहनका लागि नेपाललाई यो खेल जित्नै पर्ने दबाब छ ।

यसअघिका दुई खेलमा क्यानडा र ओमानलाई पराजित गरेको नेपाल त्यसपछि शनिबार क्यानडासँग भएको खेलमा भने पराजित भएको थियो ।

नेपाललाई हराएपछि क्यानडा ३६ खेलमा २९ अंकका साथ छैटौंमा उक्लँदा ३५ खेलमा २८ अंक भएको नेपाल सातौंमा झरेको थियो । तर आजको खेलमा  नेपालले ओमानलाई हराए फेरि छैटौं स्थानमा उक्लिनेछ ।

लिग २ को शीर्ष ६ मा पर्ने टोलीहरूको ओडीआई मान्यता जोगिने उच्च सम्भावना भएकोले शीर्ष ६ मा अटाउने कुरालाई अर्थपूर्ण रूपमा हेरिएको छ ।