अर्थमन्त्री डा वाग्ले कतार प्रस्थान

एसियाली पूर्वाधार विकास बैंकको सञ्चालक समितिको ११ औं वार्षिक बैठकमा भाग लिन नेपाली प्रतिनिधिमण्डलको नेतृत्व गर्दै अर्थमन्त्री डा.स्वर्णिम वाग्ले आज साँझ कतारको राजधानी दोहा प्रस्थान गरेका छन् ।

मन्त्री डा वाग्ले कतार एयरवेजको नियमित उडान मार्फत दोहा प्रस्थान गरेका हुन् । प्रतिनिधिमण्डलमा अर्थ मन्त्रालय, अन्तर्राष्ट्रिय आर्थिक सम्बन्ध महाशाखा प्रमुख, सहसचिव अमृत लम्साल रहेका छन् ।

एसियाली पूर्वाधार विकास बैंकको ११औँ वार्षिक बैठकका क्रममा अर्थमन्त्रीले बैंकको बोर्ड अफ गभर्नर्सको सत्रमा सहभागिता जनाउँदै नेपालको पूर्वाधार विकास, जलवायु अनुकूलन, नवीकरणीय ऊर्जा, विपद्पछिको पुनर्निर्माण र आर्थिक वृद्धिका प्राथमिकताहरूमा बहुपक्षीय सहयोग तथा लगानी परिचालनबारे छलफल गर्नेछन् ।

भ्रमणका क्रममा अर्थमन्त्रीले एसियाली पूर्वाधार विकास बैंकका अध्यक्षसँगै भारत, बंगलादेश, कतार र मालदिभ्सका अर्थमन्त्रीहरुसँग छुट्टाछुट्टै द्विपक्षीय भेटवार्ता गर्ने कार्यक्रम रहेको उनको सचिवालयले जनाएको छ ।

वार्षिक बैठक तथा निर्धारित द्विपक्षीय संवादहरू सम्पन्न गरी  अर्थमन्त्री वाग्ले नेतृत्वको प्रतिनिधिमण्डल असोज १४ गते स्वदेश फिर्ता हुनेछन् ।