आइतबारबाट बागमतीदेखि पूर्वको क्षेत्रमा वर्षा कम हुने

लगातारको वर्षाका कारण देशभरको जनजीवन प्रभावित भएको छ । बङ्गालको खाडीमा विकसित न्यून चापीय प्रणालीका कारण देशका अधिकांश स्थानमा हल्कादेखि मध्यम वर्षा भइरहेको छ ।

मौसम पूर्वानुमान महाशाखाले बङ्गालको खाडीमा विकसित न्यून चापीय प्रणालीका कारण गण्डकी र लुम्बिनी प्रदेशको पूर्वी भूभागदेखि पूर्वसम्म हल्कादेखि मध्यम वर्षा भइरहेको जनाएको हो । 

वर्षाका कारण काठमाडौंको अधिकांश खोलामा जलस्तर बढेको छ भने करिडोर सडकमा विशेष सतर्कता अपनाइएको छ । सुरक्षाकर्मीले सजकता अपनाउन गाडीबाट माइकिङ गर्दै हिँडिरहेको छ ।

त्यस्तै देशका अधिकांश नदिहरुमा समेत जलस्तर बढेको छ भने पहिरोका कारण देशका बिभिन्न स्थानमा सडक अवरुद्ध भएको छ । शनिबार बङ्गालको खाडीमा विकसित न्यून चापीय प्रणालीको असर पश्चिमतिर सर्ने देखिएको र गण्डकी, लुम्बिनी, कर्णाली र सुदूरपश्चिम प्रदेशमा भारी वर्षा हुनसक्ने महाशाखाले जनाएको छ ।

त्यसैगरि आइतबार बागमतीदेखि पूर्वको क्षेत्रमा वर्षा कम हुने तर बागमतीदेखि पश्चिममा वर्षा जारी रहने सम्भावना रहेको समेत महाशाखाले जानकारी दिएको छ ।