सत्ता गठबन्धनभित्रको विवादले बागमतीका मुख्यमन्त्रीको विश्वासको मत अन्योलमा

सत्ता गठबन्धनभित्रै विवाद चर्किएपछि बागमती प्रदेशका मुख्यमन्त्री किरण थापा मगरले लिने तयारी गरेको विश्वासको मत अन्योलमा परेको छ। दलहरूबीचको आन्तरिक विवादका कारण प्रदेशसभा बैठकसमेत प्रभावित भएको छ।

नेकपाका १३ सांसद सरकारमा भागबन्डा, मन्त्री छनोट र शक्ति बाँडफाँटको विषयमा असन्तुष्ट छन्। सांसद युवराज चौलागाईंले विवाद समाधान नभएसम्म प्रदेशसभा बैठकमा सहभागी नहुने बताएका छन्।

राप्रपाभित्र पनि मुख्यमन्त्रीलाई विश्वासको मत दिने विषयमा विवाद छ। पार्टीको निर्देशनविपरीत सरकारलाई समर्थन गरेको भन्दै राप्रपाले संसदीय दलका नेता उद्धव थापामाथि कारबाही प्रक्रिया अघि बढाएको छ भने प्रमुख सचेतक कुमारी तामाङले मुख्यमन्त्रीको विपक्षमा मतदान गर्न ह्विप जारी गरेकी छन्।

यस्तै, कांग्रेसले मुख्यमन्त्रीको नियुक्तिविरुद्ध परेको रिटको टुंगो नलाग्दै विश्वासको मत लिन प्रक्रिया अघि बढाए प्रदेशसभा बहिष्कार गर्ने चेतावनी दिएको छ।

तीनवटै दलभित्र देखिएको विवादका कारण मुख्यमन्त्री मगरका लागि विश्वासको मत जुटाउने प्रक्रिया जटिल बनेको छ। १०४ सदस्यीय बागमती प्रदेशसभामा बहुमतका लागि ५३ सांसदको समर्थन आवश्यक पर्छ।