जुड बेलिङ्घमले ९८ सेकेन्डको अन्तरमा दुई गोल गरे । त्यसपछि १० खेलाडीमा सीमित भएको अवस्थामा ह्यारी केनले पेनाल्टीमार्फत अर्को गोल थपेपछि इंग्ल्यान्डले मेक्सिकोलाई ३–२ ले पराजित गर्दै फिफा विश्वकप २०२६ को क्वार्टरफाइनलमा स्थान बनाएको छ।
यस जितसँगै इंग्ल्यान्डले सेमिफाइनल प्रवेशका लागि शनिबार अमेरिकाको फ्लोरिडा राज्यस्थित मियामी गार्डेन्समा नर्वेसँग प्रतिस्पर्धा गर्नेछ।
८० हजारभन्दा बढी दर्शक उपस्थित मेक्सिको सिटीको एस्टाडियो अज्टेकामा मेक्सिको विश्वकपमा १० खेलसम्म अपराजित थियो जसमा यस वर्षका तीन खेल पनि समावेश थिए। तर बेलिङ्घमले ३६औँ मिनेटमा हेडमार्फत पहिलो गोल गर्दै घरेलु समर्थकलाई स्तब्ध बनाए।
त्यसको केवल ९८ सेकेन्डपछि उनले ह्यारी केनको पासमा दोस्रो गोल गर्दै इंग्ल्यान्डलाई २–० को अग्रता दिलाए।
मेक्सिकोका लागि जुलियन क्विनोनेसले ४२औँ मिनेटमा एक गोल फर्काए। खेलको ५४औँ मिनेटमा इंग्ल्यान्डका जारेल क्वान्साहले हेसुस गालार्डोमाथि खतरनाक फाउल गरेपछि रातो कार्ड पाउँदै मैदान छाडे र इंग्ल्यान्ड १० खेलाडीमा सीमित भयो।
त्यसपछि मेक्सिकोका गोलकिपर राउल रान्गेलले इंग्ल्यान्डका खेलाडीमाथि फाउल गरेपछि रेफ्रीले पेनाल्टी दिएका थिए। ह्यारी केनले उक्त अवसरलाई सदुपयोग गर्दै प्रतियोगितामा आफ्नो छैटौँ तथा विश्वकप करियरको १४औँ गोल गरे। यससँगै उनले पश्चिम जर्मनीका महान् स्ट्राइकर गर्ड मुलरको विश्वकपमा १४ गोलको कीर्तिमान बराबरी गर्दै सर्वाधिक गोलकर्ताको सूचीमा संयुक्त पाँचौँ स्थान हासिल गरेका छन्।
प्रतियोगितामा केनका ६ गोल भएका छन्। उनी गोल्डेन बुटको दौडमा ७–७ गोल गरेका लियोनेल मेस्सी, किलियन एम्बाप्पे र एर्लिङ हालान्डभन्दा एक गोलले पछाडि छन्।
खेलको अन्त्यतिर भने केनले पेनाल्टी क्षेत्रभित्र फाउल गरेपछि मेक्सिकोले पेनाल्टी पाएको थियो।
राउल जिमेनेजले ‘स्टटर–स्टेप’ शैलीमा पेनाल्टीलाई गोलमा परिणत गर्दै अन्तर ३–२ मा झारे।
केन विश्वकपमा विपक्षीलाई पेनाल्टी दिलाउने कम्तीमा सन् १९६६ यताकै पहिलो खेलाडी बने।
