फ्रान्सले फिफा विश्वकप २०२६ को राउन्ड अफ ३२ मा स्विडेनलाई ३–० ले पराजित गर्दै अन्तिम १६ मा स्थान सुरक्षित गरेको छ। अब फ्रान्सले अन्तिम १६ मा पाराग्वेसँग प्रतिस्पर्धा गर्नेछ।
आज बिहान अमेरिकाको न्युयोर्क–न्यु जर्सी स्टेडियममा ८० हजार ६६३ दर्शकमाझ भएको खेलमा एमबाप्पेले पहिलो हाफको अन्त्यतिर उत्कृष्ट टोलीगत मुभलाई गोलमा परिणत गर्दै फ्रान्सलाई अग्रता दिलाए। त्यसअघि फ्रान्सले दुई पटक पोस्टमा बल प्रहार गरेको थियो जसमा एक पटक किलियन एमबाप्पे र अर्को पटक ओलिसेको प्रयास सफल हुन सकेन।
खेलभरि फ्रान्सले बलमाथि नियन्त्रण र गोलतर्फ प्रहार दुवैमा स्पष्ट दबदबा कायम राख्यो भने स्विडेन प्रभाव जमाउन असफल रह्यो।
खेलको ५३औँ मिनेटमा ओलिसेले पेरिस सेन्ट-जर्मेनका विङर ब्राडली बार्कोलालाई पास उपलब्ध गराउँदै दोस्रो गोलको अवसर सिर्जना गरे। त्यसपछि उनले नै दिएको अर्को आकर्षक पासलाई एमबाप्पेले गोलमा परिणत गर्दै फ्रान्सको ३–० को सहज जित सुनिश्चित गरे।
यस खेलमा दुई गोल गरेसँगै एमबाप्पेले प्रतियोगितामा आफ्नो गोल संख्या ६ पुर्याएका छन्। उनी अहिले गोल्डेन बुटको दौडमा लियोनेल मेस्सीसँग संयुक्त रूपमा शीर्ष स्थानमा पुगेका छन्।
फ्रान्सका कप्तान एमबाप्पेको विश्वकपमा कुल गोल संख्या १८ पुगेको छ। यससँगै उनी विश्वकप इतिहासमा मेस्सीको १९ गोलको कीर्तिमानभन्दा केवल एक गोलले मात्र पछाडि छन्। २७ वर्षीय एमबाप्पेसँग उक्त कीर्तिमान तोड्ने अवसर अझै बाँकी छ।
पहिलो गोल गरेपछि एमबाप्पे प्रशिक्षक दिदिएर डेसचाम्प्सलाई अंकमाल गर्न पुगेका थिए। आमाको निधनपछि अन्तिम समूह चरणको खेलका लागि स्वदेश फर्किएका डेसचाम्प्स यस खेलमा टोलीसँग पुनः जोडिएका हुन्।
१४ वर्षदेखि फ्रान्सको जिम्मेवारी सम्हालिरहेका डेसचाम्प्सले यो विश्वकपपछि मुख्य प्रशिक्षकको पद छाड्ने घोषणा गरिसकेका छन्। सन् १९९८ मा फ्रान्सलाई कप्तानका रूपमा विश्वकप जिताएका डेसचाम्प्सले सन् २०१८ मा प्रशिक्षकका रूपमा पनि टोलीलाई विश्व च्याम्पियन बनाएका थिए।
रोचक रूपमा सन् १९९८ को विश्वकपमा फ्रान्सले अन्तिम १६ मा पाराग्वेलाई अतिरिक्त समयमा लरेन्ट ब्लाङ्कको ‘गोल्डेन गोल’को मद्दतले १–० ले पराजित गर्दै उपाधियात्रा अघि बढाएको थियो।
फ्रान्सले अब शनिबार फिलाडेल्फियामा हुने अन्तिम १६ को खेलमा दक्षिण अमेरिकी टोली पाराग्वेसँग प्रतिस्पर्धा गर्नेछ।
फ्रान्स यस खेलको स्पष्ट दाबेदार मानिएको छ। टोलीले लगातार उत्कृष्ट लय कायम राखेको छ र क्वार्टरफाइनल यात्रा तय गर्ने अपेक्षा गरिएको छ।
स्विडेनविरुद्धको खेलमा किलियन एमबाप्पे र माइकल ओलिसे फेरि टोलीका प्रमुख खेलाडी बने। ओस्मान डेम्बेलेले पनि आफ्नो उत्कृष्ट कौशलको झलक देखाए भने चौथो फरवार्डका रूपमा डिजिरे डुएको सट्टा ब्राडली बार्कोलालाई अवसर दिइएको थियो।
स्विडेनसँग पनि प्रिमियर लिगमा खेल्ने भिक्टर ग्योकेरेस, अलेक्जान्डर इसाक र एन्थोनी एलाङ्गाजस्ता आक्रमणकारी खेलाडी थिए। तर उनीहरूले बलमा पर्याप्त नियन्त्रण नपाउँदा गोलका अवसर सिर्जना गर्न सकेनन् र प्रशिक्षक ग्राहम पोटरको टोली प्रतियोगिताबाट बाहिरियो।
यद्यपि प्लेअफ हुँदै विश्वकपमा स्थान बनाएको स्विडेनका लागि अन्तिम ३२ सम्मको यात्रा पनि उल्लेखनीय उपलब्धि मानिएको छ।
खेलको २०औँ मिनेटमा ओलिसेको उत्कृष्ट पासमा एमबाप्पेले बललाई जाली चुमाएका थिए। तर निकै झिनो अफसाइड निर्णयका कारण गोल मान्यता पाएन।
त्यसपछि फ्रान्सले लगातार दबाब बढायो। जुल्स कुन्डेको पासमा एमबाप्पेको प्रहार पोस्टमा लाग्यो भने एड्रियन राबियोको प्रहार थोरैले माथिबाट बाहिरियो।
त्यसपछि ओलिसेले गरेको आकर्षक 'ओभरहेड बाइसाइकल किक' पोस्टमा लाग्यो। रिबाउन्डमा डेम्बेलेले गरेको प्रयास पनि लक्ष्यभन्दा बाहिर रह्यो।
पहिलो हाफको इन्जुरी समयतिर स्विडेनका गोलरक्षक याकब विडेल जेटरस्ट्रोमले ओलिसेको प्रहारलाई कर्नरमा फर्काए। त्यसपछि प्राप्त कर्नरमा डेम्बेले र ओलिसेको संयोजनपछि बल एमबाप्पेसम्म पुग्यो र उनले सहज रूपमा गोल गर्दै फ्रान्सलाई अग्रता दिलाए।
दोस्रो हाफ सुरु भएको आठ मिनेटमै फ्रान्सले अर्को गोल थप्यो। ओलिसेले गुस्ताफ लागरबिल्केको खुट्टाबीचबाट निकालेको सटिक पासलाई बार्कोलाले शक्तिशाली प्रहारमार्फत गोलमा परिणत गरे।
ओलिसे आफैंले एक उत्कृष्ट अवसर गुमाए पनि त्यसको केहीबेरपछि उनले एमबाप्पेलाई अर्को शानदार पास उपलब्ध गराए। खेलको ७४औँ मिनेटमा एमबाप्पेले घुमाउरो प्रहारमार्फत आफ्नो दोस्रो गोल गर्दै फ्रान्सको ३–० को सहज जित सुनिश्चित गरे।
हालको प्रदर्शन हेर्दा फ्रान्स निकै बलियो देखिएको छ। यद्यपि टोलीका लागि कठिन चुनौतीहरू अझै बाँकी छन्। त्यसका बाबजुद अन्तिम १६ मा पाराग्वेलाई फ्रान्सविरुद्ध टिक्न निकै कठिन हुने अनुमान गरिएको छ।
