भिनिसियस जुनियरले एक गोल गर्दै र अर्को गोलका लागि अवसर सिर्जना गर्दै उत्कृष्ट प्रदर्शन गरेपछि पाँच पटकको विश्व च्याम्पियन ब्राजिलले हैटीलाई ३–० ले पराजित गरेको छ । यो पराजयसंगै हैटि विश्वकपबाट बाहिरिएको छ । हैटी जो पश्चिमी गोलार्धको सबैभन्दा गरिब राष्ट्रमध्ये एक हो र सन् १९७४ पछि पहिलो पटक विश्वकपमा छनोट भएको थियो ।
हैटी नकआउट चरणमा पुग्न नसक्ने पहिलो टोली बनेको छ। अर्कोतर्फ ब्राजिलले समूह चरणमा आवश्यक निर्णायक जित हासिल गर्यो।
म्याथुअस कुन्हाले खेलको सुरुआती रोजाइमा मौका पाएपछि आफ्नो क्षमताको उत्कृष्ट प्रदर्शन गरे। कार्लो एन्सीलोटीले मोरक्कोविरुद्धको पहिलो खेलमा उनलाई अन्तिम समयमा मात्र मैदानमा उतारेका थिए जहाँ ब्राजिल १–१ को बराबरीमा रोकिएको थियो। तर हैटीविरुद्ध सुरुदेखि खेल्ने अवसर पाएका कुन्हाले दुई गोल गर्दै प्रशिक्षकको विश्वासलाई सही साबित गरे।
कुन्हाले आफ्नो करियरको पहिलो विश्वकप गोल रिबाउन्ड बललाई जाली चुमाएर गरे। त्यसपछि उनले बायाँ खुट्टाले प्रहार गरेको उत्कृष्ट शट गोलपोस्टको माथिल्लो बायाँ कुनामा पुग्दै ब्राजिललाई पहिलो हाफमै २–० को अग्रता दिलाए।
ब्राजिलका फरवार्ड राफिन्हाको सुरुआती गोल अफसाइडका कारण रद्द गरिएको थियो। उनी पहिलो हाफमै चोटका कारण मैदानबाट बाहिरिनुपरेको थियो। यद्यपि यसले पहेंलो जर्सी लगाएका ब्राजिली समर्थकहरूको उत्साहलाई लामो समय दबाउन सकेन।
फिल्लाडेल्फिया स्थित रंगशालामा उपस्थित ६८,३२४ दर्शकमध्ये अधिकांश ब्राजिल समर्थक थिए। उनीहरूले उत्साहपूर्वक आफ्नो टोलीलाई समर्थन गरेका थिए। रंगशाला फिलाडेल्फिया इगलको घरेलु मैदान हो, जहाँ टोलीका चियरलिडरहरूले पनि दर्शकहरूलाई उत्साहित बनाउन भूमिका खेले।
हैटीका समर्थकहरूले आफ्नो राष्ट्रिय टोलीको परम्परागत युद्धघोष “ग्रेनेडियर्स, आक्रमण गर!” गाउँदै नाचेका थिए। त्यसको जवाफमा ब्राजिल समर्थकहरूले आफ्नो देश पाँच पटकको विश्व च्याम्पियन भएको र फुटबलका महान् खेलाडी पेलेको जन्मभूमि भएको स्मरण गराउँदै नारा लगाए:
“एक हजार गोल! एक हजार गोल! केवल पेले! केवल पेले!”
