कोसी प्रदेशका निर्माण व्यवसायीहरुले ठेक्का रकम समायोजन वा म्याद थप गर्न सरकारसँग माग गरेका छन् ।
मध्यपूर्वमा जारी युद्धका कारण पेट्रोलियम पदार्थ तथा निर्माण सामग्रीको मूल्यमा भएको तीव्र भएपछि काम गर्न कठिन भएको भन्दै उनीहरुले ठेक्का रकम समायोजन वा म्याद थप गर्न माग गरेका हुन् । निर्माण व्यवसायी महासंघ, कोसी प्रदेशले आइतबार विराटनगरमा पत्रकार सम्मेलन गर्दै हालको मूल्यवृद्धिका कारण निर्माण कार्यलाई निरन्तरता दिन गम्भीर कठिनाइ भइरहेको जनाएको हो ।
पत्रकार सम्मेलनमा निर्माण व्यवसायी महासंघ, कोसी प्रदेशका अध्यक्ष अध्यक्ष जनसेवक भण्डारीले सरकारले तत्काल आवश्यक निर्णय नगरे निर्माण क्षेत्र नै धराशायी हुने बताए । यसअघि पनि नीतिगत जटिलताका कारण ठेक्का कार्य सुरु गर्न समस्या भएको भएको अवस्थामा अहिले मूल्यवृद्धिले अवस्था झन् जटिल बनाएको उनले बताए ।
व्यवसायीहरुका अनुसार पेट्रोलियम पदार्थको बढ्दा सिमेन्ट, डण्डी तथा गिट्टी–बालुवाजस्ता सामग्रीमा २० प्रतिशतसम्म वृद्धि भएको छ । विशेष गरी बिटुमिनको मूल्य शतप्रतिशत बढेपछि सडक निर्माण कार्य प्रभावित भएको छ । यस अवस्थाले अधिकांश पूर्वाधार आयोजना ठप्प हुने अवस्थामा पुगेको भन्दै व्यवसायीहरूले तत्काल राहत, मूल्य समायोजन वा म्याद थपको व्यवस्था गर्न सरकारसँग माग गरेका छन् ।
