राष्ट्रपति ट्रम्प सहभागी डिनर कार्यक्रममा आक्रमण गर्ने को हुन्?

अमेरिकामा राष्ट्रपति डोनाल्ड ट्रम्प सहभागी रहेको डिनर कार्यक्रममा एक हतियारधारी व्यक्तिले आक्रमण गर्ने प्रयास गर्दा ठूलो सुरक्षा घटना भएको छ ।

प्रारम्भिक जानकारीअनुसार ती व्यक्तिले बन्दुक र चक्कु लिएर कार्यक्रम स्थलको लबी क्षेत्रमा प्रवेश गर्ने प्रयास गरेका थिए, जसपछि सुरक्षाकर्मीहरू तत्काल सक्रिय भएका थिए र उनलाई नियन्त्रणमा लिएका थिए । घटनाका क्रममा गोली चलेको आवाज सुनिएको थियो र केही अतिथिहरू डराएर टेबलमुनि लुकेका थिए । राष्ट्रपति ट्रम्पलाई सुरक्षाकर्मीहरूले तुरुन्तै सुरक्षित स्थानमा लगेका थिए र उनी सकुशल छन् ।

सुरक्षा अधिकारीहरूसँग भएको मुठभेडमा आक्रमणकारीले गोली हानेको र सुरक्षाकर्मीहरूले पनि जवाफी कारबाही गरेको बताइएको छ ।

एक सुरक्षा अधिकारीलाई गोली लागेको भए पनि बुलेटप्रुफ ज्याकेटका कारण गम्भीर क्षति हुनबाट जोगिएको छ । आक्रमणकारीलाई घटनास्थलमै नियन्त्रणमा लिइएको छ र उनी एक्लै योजना बनाएर आएको प्रारम्भिक निष्कर्ष छ ।
अमेरिकी सरकारी वकिलका अनुसार उक्त संदिग्धविरुद्ध हिंसात्मक अपराधका क्रममा हतियार प्रयोग गरेको र सङ्घीय सुरक्षाकर्मीमाथि खतरनाक हतियार प्रयोग गरी आक्रमण गरेको आरोप लगाइनेछ । उनलाई सोमबार राजधानीस्थित सङ्घीय अदालतमा पेश गरिनेछ ।

समाचार स्रोतका अनुसार घटना अचानक भएको भए पनि सुरक्षाकर्मीहरूको तत्काल प्रतिक्रियाका कारण ठूलो दुर्घटना हुनबाट जोगिएको छ । अहिले घटनाबारे विस्तृत अनुसन्धान जारी छ र सुरक्षालाई अझ कडा बनाइएको छ ।

को हुन् आक्रमणकारी

अमेरिकी राष्ट्रपति ट्रम्पले ह्वाइट हाउसमा बोल्दै धेरै हतियार बोकेको आक्रमणकारीलाई  सिक्रेट सर्भिसका अत्यन्त साहसी सदस्यहरूले नियन्त्रणमा लिएको बताएका छन्।

ट्रम्पका अनुसार एक सिक्रेट सर्भिस अधिकारी नजिकबाट गोली लागेर घाइते भएका थिए तर उनको बुलेटप्रुफ ज्याकेटले ज्यान जोगाएको थियो।

राष्ट्रपतिले कथित आक्रमणकारीको तस्वीर र गोली चल्न थालेको जस्तो देखिने भिडियो पनि सार्वजनिक गरेका छन्।

अमेरिकी सञ्चारमाध्यमका अनुसार सन्दिग्ध व्यक्तिको पहिचान ३१ वर्षीय कोले टोमस एलेनका रूपमा गरिएको छ  जो टोरेन्स निवासी हुन्। 
कार्यक्रममा उपस्थित व्यक्तिहरूले ठूलो अन्योलबीच टेबलमुनि लुकेका थिए ।