काठमाडौं, चैत २४ :
नेपाली कम्युनिस्ट पार्टी (नेकपा) मा महाधिवेशनको विषयले प्रवेश पाएको छ । पार्टी केन्द्रीय कार्यालय पेरिसडाँडामा जारी केन्द्रीय कार्यसंयोजन समितिको बैठकमा ६ महिनाभित्र महाधिवेशन गर्ने, निर्वाचन परिणामको समीक्षा, आगामी कार्यक्रमबार नेताहरुले धारणा राखिरहेका छन् ।
संयोजक पुष्पकमल दाहालले सोमबारको केन्द्रीय कार्यसंयोजन समितिको बैठकमा ६ महिनाभित्र महाधिवेशन गर्ने प्रस्ताव लिखित रुपमा राखेपछि यो विषयमा औपचारिक छलफल सुरु भएको हो । बैठकमा नेताहरुले छिटो महाधिवेशन गरी संगठनलाई गति दिनुपर्ने सुझाव दिएका छन् ।
साथै उनीहरुले फागुन २१ को निर्वाचनमा पार्टीले ठूलो पराजय भोग्नुमा जनताको आक्रोश, कमजोर मुद्दा, संगठन क्रियाशील हुन नसक्नुलगायत कारण औंल्याएका छन् ।
