बीपी राजमार्गमा सवारी आवागमन बन्द

बीपी राजमार्ग भएर चल्ने सवारी आवागमनमा रोक लगाएको छ । मंगलबार साँझ रोसी खोलाको जलाधार क्षेत्र पनौती लगायतका स्थानमा वर्षा भइरहेकाले तत्कालका लागि राजमार्गमा सवारी सञ्चालन बन्द गरिएको जिल्ला प्रहरी कार्यालय काभ्रेले जनाएको छ ।

गत वर्षको बाढीका कारण बीपी राजमार्गको भकुन्डेदेखि नेपालथोकसम्मको २८ किलोमिटर सडक खण्डमा क्षति पुगेको थियो । बाढीले सडक बगाएपछि हाल उक्त क्षेत्रमा डाइभर्सन निर्माण गरी खोलाकै किनारबाट सवारी साधन सञ्चालन हुँदै आएका छन् । नदी किनारकै अस्थायी मार्ग भएकाले वर्षा हुनासाथ आवागमन प्रभावित हुने गरेको छ ।