काठमाडौं, चैत २ :
विशेष अदालतले पूर्वसांसद सन्तोष चालिसेसँग ५ लाख धरौटी माग गरेको छ । सोमबार विशेष अदालतका न्यायाधीश नारायणप्रसाद पौडेल र विदुर कोइरालाको इजलासले थुनछेक बहस गर्दै धरौटी माग गरेको हो ।
गोकर्णेश्वर नगरपालिकाको मेयर भएका बेलामा ८ करोड ५६ लाख रुपैयाँको सम्पत्ति जोडेका उनले ४ करोड ८८ लाख रुपैयाँ मात्रै वैध रूपमा आर्जन गरेको अख्तियारको दाबी छ ।
योमध्ये उनले ३ करोड ६८ लाख रुपैयाँ गैरकानुनी आर्जन गरेको अख्तियारको अभियोगपत्रमा उल्लेख छ । अख्तियारले चालिसेसहित उनकी पत्नी मन्दिरा चालिसे, छोरा सागर चालिसे र सञ्जिव चालिसे र बुहारी प्रमिला पोखरेललाई सम्पत्ति जफत गर्ने प्रयोजनका लागि प्रतिवादी बनाएको थियो । चालिसेमाथि गैरकानुनी सम्पत्ति आर्जन गरेको अभियोगमा मंसिर २८ गते भ्रष्टाचार मुद्दा दायर गरेको थियो ।
