जवाफदेहिता निगरानी समितिले गत ‘भदौ २३ र २४ को घटनासम्बन्धी जाँचबुझ आयोग’ प्रतिवेदन तत्काल सार्वजनिक गर्न माग गरेको छ । समितिले आयोगको समग्र प्रतिवेदन सार्वजनिक गरी पीडित समुदाय, नागरिक समाज, मिडियालगायत आम नागरिकको सुसूचित हुन पाउने अधिकारको सम्मान गर्न माग गरेको हो ।
समितिका संयोजक राजुप्रसाद चापागाईंले आज प्रेस विज्ञप्ति जारी गरी उक्त आयोगको प्रतिवेदन तत्काल सार्वजनिक गर्न माग गरेका हुन्। विज्ञप्तिमा भनिएको छ, “प्रतिवेदन सार्वजनिक गर्ने वा नगर्ने भन्ने कुरा सरकारको तजबिजको विषय होइन प्रतिवेदनबारे जानकारी पाउने आम नागरिकको संविधानप्रदत्त अधिकार हो भने छानबिन प्रतिवेदनलाई यथाशीघ्र सार्वजनिक जानकारीमा ल्याउनु सरकारको दायित्व हो ।”
जाँजबुझ आयोगले दुई दिनअघि प्रतिवेदन सरकारलाई बुझाएको छ । त्यसमा दोषीलाई कारबाही गर्न सिफारिस गरिएको भए पनि को-को परे भनेर सरकारले सार्वजनिक गरेको छैन । आयोगका संयोजक गौरीबहादुर कार्कीले छानबिन अनुसार देखिएका दोषीलाई कारबाही गर्न सिफारिस गरिएको र सरकारले त्यसलाई सार्वजनिक गरेर कार्यान्वयन गर्नुपर्नेमा जोड दिएका छन् ।
