अमेरिकामा भीषण जाडोयामको आँधी आउँदा कम्तीमा सात जनाको मृत्यु, ८ लाख घरधुरी विद्युत विहिन

अमेरिकाभर फैलिएको एक खतरनाक जाडोयामको आँधीका कारण कम्तीमा सात जनाको मृत्यु भएको छ भने ८ लाख घरधुरीमा विद्युत् आपूर्ति अवरुद्ध भएको छ।

नेशनल वेदर सर्भिसका अनुसार टेक्सासदेखि न्यू इङ्ग्ल्यान्डसम्म ज्यान जोखिममा पार्ने अवस्थाहरू देखिएपछि देशभरका विद्यालय र सडकहरू बन्द गरिएका छन् र उडानहरू रद्द गरिएका छन्।

लुइजियानामा कम्तीमा दुई जनाको मृत्यु हाइपोथर्मियाका कारण भएको छ भने टेक्सास, टेनेसी र क्यान्ससमा पनि आँधीसँग सम्बन्धित अन्य मृत्युका घटनाहरू भएका छन्।

आइतबार दिउँसोसम्म ८ लाखभन्दा बढी घरधुरीमा विद्युत् आपूर्ति बन्द भएको थियो। ११ हजारभन्दा बढी उडानहरू रद्द गरिएका छन्।

व्यापक रूपमा परेको भारी हिमपात, असिना र जम्ने वर्षा जहाँ चिसिएका वर्षाका थोपा सतहमा पर्नासाथ जम्छन् । धेरै दिनसम्म जारी रहन सक्ने देखिएको छ। यो आँधीले करिब १८ करोड अमेरिकीहरू अर्थात् जनसंख्याको आधाभन्दा बढीलाई प्रभावित गर्न सक्ने अनुमान गरिएको छ।

लुइजियानाको स्वास्थ्य विभागले आइतबार दुई पुरुषको मृत्यु हाइपोथर्मियाका कारण भएको पुष्टि गरेको छ।

टेक्सासको अस्टिन शहरका मेयरले चिसोको सम्पर्कका कारण एक जनाको मृत्यु भएको बताएका छन्।

क्यान्ससका अधिकारीहरूले आइतबार दिउँसो हिउँले ढाकिएको अवस्थामा भेटिएकी एक महिलाको हाइपोथर्मियाका कारण मृत्यु भएको हुन सक्ने बताएका छन्।

टेनेसीमा पनि मौसमसँग सम्बन्धित कारणले तीन जनाको मृत्यु भएको रिपोर्ट गरिएको छ।

न्युयोर्क सिटीका मेयर जोहरान मामदानीले सामाजिक सञ्जाल एक्समा गरेको पोस्टमा शनिबार शहरमा कम्तीमा पाँच जनाको मृत्यु भएको बताए तर मृत्युको कारण अझै निश्चित नभएको उल्लेख गरे।