मानसरोवर कैलाश जानेको सङ्ख्या बढ्यो, व्यवसाय चलायमान

गत जेठदेखि भदौ २५ सम्म मानसरोवर कैलाश धार्मिक यात्राका लागि सात हजार पाच सय २३ जना तिर्थ यात्रुले रसुवागढी मार्गबाट धार्मिक यात्रा गरेका छन् ।

रसुवागढीस्थित अध्यागमन कार्यालय टिमुरेका प्रमुख मुरारी निरौलाले कैलाश यात्रा गर्ने यात्रीमध्ये ६० प्रतिशत नेपाली तथा ४० प्रतिशत अष्ट्रेलिया, अमेरिका, क्यानडा र बेलायत बस्ने गैरआवासीय नेपाली भएको जानकारी दिनुभयो ।

 उनीहरूको साथमा करिब दुई सय अन्य देशका पर्यटक समेत मानसरोवर कैलाश गएको अध्यागमन कार्यालयले जनाएको छ । 

धार्मिक यात्रीमध्ये काठमाडौँबाट टिमुरे तथा स्याफ्रुबेंसीका लागि दुई हजार १० यात्री हेलिकप्टरबाट र अन्य यात्री मोटरमार्फत स्थलमार्गबाट रसुवागढी पुगेको रसुवा जिल्ला प्रहरी प्रवक्ता नेत्रप्रसाद पौडेलले जानकारी दिनुभयो । 

मानसरोवर कैलाश यात्राका लागि फाट्टफुट्ट रूपमा जान नपाइने र ट्राभल एजेन्सी मार्फत समूहगत भिसामा मात्र जान पाइने चिनियाँ प्रावधान रहेको बताउँदै अध्यागमन प्रमुख निरौलाले खर्चको हिसाबमा नेपालीका लागि ट्राभल एजेन्सी अनुसार फरक- फरक दररेट पाइएको छ। ने

पालीका लागि कुनै ट्राभल एजेन्सीले एक लाख ३५ हजार र कुनैले एक लाख ७० हजारसम्म लिने गरेको यात्रीले बताएका छन् ।

समुद्र सतहबाट पाँच हजार सात सय मिटरको उचाइमा जानुपर्ने भएका कारण ट्रेकिङ एजेन्सीले ठाउँठाउँमा बास राखी हावापानीको वातावरण मिलाउँदै लाने गरेको र १० दिन अन्तरालमा धार्मिक यात्रा सम्पन्न गराई नेपाल फर्काउने गरेको बताइएको छ ।

यात्री टिमुरे तथा घट्टेखोला क्षेत्रका होटलमा एक रात बस्ने गरेका कारण सीमावर्ती स्थानका होटल तथा लज व्यवसाय चलायमान भएको व्यवसायीले बताएका छन् ।