इरानबाट एकै दिनमा ३० हजारभन्दा बढी अफगान शरणार्थी स्वदेश फर्के

इरानबाट एकै दिनमा ३० हजार भन्दा बढी अफगान शरणार्थीहरू स्वदेश फर्केका छन् ।  पश्चिमी हेरातको इस्लाम काला सीमा पार गरेर उनीहरु स्वदेश फर्केको स्थानीय अधिकारीले बताएका छन् ।

अफगानिस्तानले इरानसँग एउटा पश्चिमी हेरात प्रान्तमा र अर्को निमरोज प्रान्तमा गरी दुईवटा प्रमुख सीमाहरु खुला गरेको छ। हालसालै दुवै सीमाहरूबाट फर्कने शरणार्थीहरूको सङ्ख्या तीव्र भएको जनाइएको छ ।

सूचना र संस्कृति विभागका प्रान्तीय निर्देशक मौलवी अहमदुल्लाह मुत्ताकीले उनीहरुलाई पानी, खाना र तत्काल चिकित्सा सहायतासहित सबै आवश्यक आपूर्तिहरू प्रदान गरिएको जनाएका छन् ।

अनुमानित दुई–तीन हजार व्यक्ति र करीब ३०० परिवारहरू निमरोज प्रान्तको पुल–ए–अब्रेसम सीमा पार गरेर हरेक दिन अफगानिस्तान फर्किरहेको शरणार्थी र स्वदेश फिर्तीका प्रान्तीय निर्देशकले बताएका छन् ।

करिब ७० लाख अफगान शरणार्थीहरू विदेशमा बसिरहेका छन्, जसमध्ये सबैभन्दा बढी इरान र पाकिस्तानमा रहेका छन् ।