विपक्षीलाई सभामुखको आग्रह- संसद्लाई प्राणहीन नबनाउनुस्

संसद् लगातार अवरुद्ध भइरहँदा सभामुख देवराज घिमिरेले सांसदहरूलाई संसद् प्राणहीन नबनाउन आग्रह गरेका छन्।

बुधबारको बैठक पनि प्रमुख प्रतिपक्ष दल माओवादी केन्द्र, रास्वपा, राप्रपा र एकीकृत समाजवादीका सांसदहरूले औँला ठड्याएर नाराबाजी गरेका कारण अगाडि बढ्न सकेन।

बैठक सुरु हुनासाथ नाराबाजीमा उत्रिएका सांसदहरूलाई सम्बोधन गर्दै सभामुख घिमिरेले भने, ‘सदन दुई हप्तादेखि अवरुद्ध छ। सदन देशका समस्याहरूको विषयमा छलफल गर्ने सर्वोच्च निकाय हो भन्ने कुरा भुल्नु हुँदैन।’

उनले सबै सांसदलाई आसन ग्रहण गरेर दलीय आधारमा धारणा राख्न आह्वान गरे। ‘वातावरण बनाएर कार्यसूचीअन्तर्गत छलफल गर्नुपर्ने हो। प्रतिपक्ष, सत्तापक्ष र सम्पूर्ण सांसदहरूले विषयवस्तु उठाउन सक्ने व्यवस्था हामी बनाउनेछौँ,’ सभामुखले भने।

तर, सभामुखको यो आग्रह पनि निष्फल रह्यो। सांसदहरूले नाराबाजी जारी राखेपछि आजको बैठक स्थगित भयो। अब संसद् बिहीबार दिउँसो ३ बजे बस्नेछ।

प्रतिपक्षले जेठ १३ यता विभिन्न मागहरू अघि सारेर सदन अवरुद्ध गर्दै आएको छ। प्रतिपक्षका अनुसार सरकारले उनीहरूको गम्भीर मागहरूलाई बेवास्ता गर्दै आएको छ। उता सत्तापक्ष भने संसद् संवादको थलो हो भन्दै छलफलमा बस्न आग्रह गर्दै आएको छ।

विपक्षीको लगातार अवरोधले महत्वपूर्ण विधेयकहरू थाँती परिरहेका छन् भने संसद् सञ्चालन नहुँदा जनप्रतिनिधिहरूको भूमिकाप्रति पनि प्रश्न उठ्न थालेको छ। यस्तो अवस्थालाई लिएर सर्वसाधारणदेखि राजनीतिक विश्लेषकसम्मले ‘भत्ता पचाउने संसदीय शैली’ भन्दै आलोचना गर्न थालेका छन्।

राजनीतिक संवाद र सहमतिको बाटोबाट संसद् पुनः क्रियाशील बनाउने उपाय खोजिनुपर्नेमा सर्वत्र जोड दिइँदैछ। सत्तापक्ष र प्रतिपक्ष दुवै पक्षले देश र जनताको हितलाई प्राथमिकतामा राखेर अगाडि बढ्नुपर्ने आवश्यकता छ।