सत्तारुढ नेपाली कांग्रेसका सभापति शेरबहादुर देउवाले प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डलाई संसद् सञ्चालनमा सहयोग गर्न आग्रह गरेका छन् ।
देउवाले आफूलाई भेट्न बुढानीलकण्ठ आएका प्रचण्डलाई अहिले जटिल परिस्थिति भएको भन्दै संसद् बैठक सञ्चालन गर्न सहयोग गर्न आग्रह गरेका हुन् ।
भेटमा देउवाले अहिलेको जटिल राजनीतिक परिस्थितिमा संसद् चलाउन विपक्षी सहयोग आवश्यक भएको भन्दै सहयोगको अपिल गरेका हुन् । प्रचण्डले भने देउवाको आग्रहलाई विपक्षी दलहरुसँग छलफल गरेर निर्णय गर्ने बताए ।
गृहमन्त्रीसमेत रहेका कांग्रेस नेता रमेश लेखक भिजिट भिसा प्रकरणमा मुछिएकाले कांग्रेस सभापतिको धारणा बुझ्न विपक्षीको तर्फबाट प्रचण्डलाई पठाइएको हो । विपक्षी दलहरूले लेखकको राजीनामाको माग गर्दै संसद् अवरुद्ध गर्दै आएका छन् । संसद अवरुद्ध हुँदा बजेटमाथिको छलफल अगाडि बढ्न सकेको छैन ।
सभामुख देवराज घिमिरेले गरेको प्रयास पनि निरर्थक भएको छ ।
