प्रचण्डको क्यारिकेचर गर्ने कलाकार घनश्याम गौतमको निधन

कलाकार घनश्याम गौतमको निधन भएको छ । टेलिशृंखला, प्रहसनहरूमा नेकपा माओवादी केन्द्रका अध्यक्ष पुष्पकमल दाहाल प्रचण्डको क्यारिकेचर गरेर चर्चित बनेका गौतमको गएराति ४३ वर्षको उमेरमा निधन भएको हो ।

उनी दुई वर्षदेखि आन्द्राको क्यान्सर रोगबाट पीडित थिए । उनको भक्तपुर ताथलीमा रहेको काठमाडौं क्यान्सर अस्तालमा उपचार भइरहेको थियो । उपचारकै क्रममा उनको निधन भएको हो ।

कलाकार गौतमको फेसबुक एकाउन्टबाट मंगलबार राति १:०५ बजेको समयमा एउटा तस्बिरसहितको पोस्टमा भनिएको छ, ‘अब हामी माझ रहनु भएन ! हार्दिक श्रद्धाञ्जली ।’

रंग क्षेत्रमा सक्रिय गौतम सडक नाटक, रेडियो नाटक, कचहरीमा पनि अभिनय गर्थे । उनको आजै पशुपति आर्यघाटमा अन्त्येष्टि गरिएको छ ।