रेडक्रस अन्तर्राष्ट्रिय समितिको नेपालस्थित नियोगले बेपत्ता पारिएका व्यक्तिको छानबिन आयोगलाई आवश्यक सहयोग गर्न तयार रहेको प्रतिबद्धता जनाएको छ ।
आयोगका अध्यक्ष लिलादेवी गड्तौलासहितका पदाधिकारीसँगको शिष्टाचार भेटवार्तामा नियोग प्रमुख सन्देश श्रेष्ठले कार्यादेश अनुरुप आयोगले सुरु गरेको प्रारम्भिक काम कारबाही प्रशंसनीय भएको बताइन् । आयोगबाट छोटो समयमा भएका प्रगति र चालिएका कदमको नियोगका तर्फबाट प्रशंसा भएको आयोगका सदस्य तथा प्रवक्ता श्रृजना पोखरेलले जानकारी दिइन् ।
आयोगलाई के कति र के कस्तो सहयोग आवश्यक पर्छ त्यो आश्यकताअनुसार उपलब्ध गराउन नियोगका तर्फबाट प्रतिबद्धता जनाएको सदस्य पोखरेलले बताइन् । सो अवसरमा नियोग प्रमुख श्रेष्ठले आगामी दिनमा बेपत्ता पारिएका व्यक्तिको छानबिनसम्बन्धी प्रक्रिया र विधिबारे जिज्ञासा राखेका थिए ।
आयोगले नयाँ पदाधिकारीको नियुक्तिसँगै प्रकाशन गर्नुपर्ने सूचना जारी गरी सम्बन्धित कार्यालयमा पत्राचार गरिसकेको छ । आयोगले ऐन बमोजिम कार्य प्रारम्भ र नियमावलीका लागि मस्यौदा तयार कार्य सुरु गरिसकेको छ । त्यसपछि आयोगले द्वन्द्व पीडित र विज्ञसँग छलफल गर्ने जनाएको छ ।
नियमावली आएपछि आयोगले आफ्नो चार वर्षे कार्ययोजना बनाउने सोच अघि बढाएको सदस्य पोखरेलले जानकारी दिइन् । आयोगले यसअघि नै पीडित मैत्री भएर काम गर्ने प्रतिबद्धता गरिसकेको छ ।
