नेपाली कांग्रेसले ‘भिजिट भिसा’ प्रकरणमा गृहमन्त्री रमेश लेखकको कुनै संलग्नता नरहेको निष्कर्ष निकालेको छ ।
सभापति शेरबहादुर देउवाको निजी निवास बूढानीलकण्ठमा सोमबार बसेको पदाधिकारी बैठकले गृहमन्त्री लेखकको ‘भिजिट भिसा’ प्रकरणमा संलग्नता नरहेको जनाएको हो । साथै लेखकले गृहमन्त्री पदबाट राजीनामासमेत दिनुनपर्ने निष्कर्ष निकालेको छ । पार्टीभित्रै पनि लेखकको राजीनामा माग भइरहेका बेला पदाधिकारी बैठकले यस्तो निष्कर्ष निकालेको हो ।
‘उहाँ निर्दोष हुनुहुन्छ । भिजिट भिसा प्रकरणमा कुनै संलग्नता छैन भन्ने कुरामा हामी विश्वस्त छौं,’ बैठकपछि प्रवक्ता डा. प्रकाशशरण महतले भने, ‘छानबिनको दायरामा गृहमन्त्री हुनुहुन्नु, उहाँमाथि उजुरी छैन । उहाँलाई दोषी भन्न मिल्दैन ।’
आफ्नै पार्टीबाट गृहमन्त्री लेखक भिजिट भिसा प्रकरणको आरोपमा मुछिएको र उनको राजीनामा मागिएका बेला कांग्रेस पदाधिकारी बैठक बसेको हो ।
