नेकपा एमालेले गणतन्त्रविरोधी कुनै पनि गतिविधि सह्य नहुने स्पष्ट गर्दै आगामी जेठ १५ गते गणतन्त्र दिवस देशव्यापी रूपमा भव्य रूपमा मनाउने निर्णय गरेको छ।
ललितपुरको च्यासलस्थित पार्टी केन्द्रीय कार्यालयमा आइतबार बसेको सचिवालय बैठकले उक्त निर्णय गरेको हो।
बैठकपछि महासचिव शंकर पोखरेलले गणतन्त्र जनताको अधिकारको रूपमा स्थापित भएकाले यसको रक्षा र सुदृढीकरण एमालेको प्रतिबद्धता रहेको बताए।
‘जनताको विरुद्धमा हुने कुनै पनि गतिविधि एमालेका लागि स्वीकार्य हुँदैन,’ पोखरेलले भने, ‘गणतन्त्रलाई उत्सवका रूपमा मनाउन आम जनसमुदायलाई सहभागी हुन आह्वान गर्ने निर्णय गरेका छौं।’
राजावादी समूहले पनि सोही दिन प्रदर्शन गर्ने तयारी गरेका सन्दर्भमा एमालेले गणतन्त्रविरोधी गतिविधिको प्रतिवाद गर्ने निर्णय समेत गरेको छ।
पार्टीले देशभरका पालिकास्तरमा विशेष कार्यक्रम आयोजना गर्नेछ भने काठमाडौं उपत्यकामा सांस्कृतिक झाँकीसहित उत्सव मनाइनेछ। उक्त कार्यक्रमको संयोजन नेपाल जनसांस्कृतिक महासंघले गर्नेछ।
प्रचार विभाग प्रमुख राजेन्द्र गौतमका अनुसार, पार्टी संगठनलाई गणतन्त्र दिवसलाई भव्य र सशक्त रूपमा मनाउन निर्देशन दिइएको छ।
