नेपालका कर्मचारीलाई उच्च शिक्षा अध्ययन गर्न जापानले ४२ करोड बढि छात्रवृत्ति दिने

जापानले नेपालको निजामती सेवाका कर्मचारीलाई त्यहाँका विश्वविद्यालयमा उच्च शिक्षा अध्ययन गर्न करिब जापानी येन ४५ करोड ४० लाख (अनुमानित नेरु ४२ करोड २३ लाख) छात्रवृत्ति सहयोग गर्ने भएको छ । 

अर्थ मन्त्रालयमा आज आज भएको कार्यक्रममा सम्झौतापत्रमा अर्थसचिव डा रामप्रसाद घिमिरे र नेपालका लागि जापानी राजदूत किकुता युताकाले हस्ताक्षर गर्नुभएको हो ।

सम्झौतासँगै नेपालका युवा निजामती सेवाका कर्मचारीलाई जापानको विश्वविद्यालयमा दुईवर्षे स्नातकोत्तर र तीनवर्षे विद्यावारिधि अध्ययन गर्नका लागि छात्रवृत्ति सहयोग प्राप्त हुने जनाइएको छ । 

यसवर्ष २० जना स्नातकोत्तर र दुई जना विद्यावारिधि गरी २२ जना कर्मचारीलाई छात्रवृत्ति प्रदान गरिने जानकारी दिएको छ ।  

नेपालका लागि जापानी राजदूत किकुताले नेपालका निजामती सेवाका कर्मचारीलाई दक्ष बनाउन छात्रवृत्ति कार्यक्रमले सहयोग गर्ने विश्वास व्यक्त गर्नुभयो ।