काठमाडौँ, चैत १६ :
रिपोर्टर्स क्लब नेपालले यो वर्षको गिरिजाप्रसाद कोइराला स्मृति पत्रकारिता पुरस्कार वरिष्ठ पत्रकार एवं त्रिभुवन विश्वविद्यालयका उपप्राध्यापक डा जगत नेपाललाई प्रदान गर्ने घोषणा गरेको छ ।
पूर्वप्रधानमन्त्री गिरिजाप्रसाद कोइरालाको स्मृतिमा स्थापित एक लाख राशिको सो पुरस्कार क्लबको यही चैत १७ गते मनाइने २७औँ वार्षिकोत्सव समारोहमा प्रधानमन्त्री केपी शर्मा ओलीको हातबाट प्रदान गरिने जनाइएको छ । डा नेपाल विगत तीन दशकदेखि सक्रिय पत्रकारिता र प्राध्यापनमा छन् ।
त्यसैगरी क्लबले यस वर्षको ‘मदन भण्डारी स्मृति पत्रकारिता पुरस्कार’ जनता टाइम्स डटकमका अध्यक्ष तथा प्रधानसम्पादक गणेशबहादुर बस्नेतलाई प्रदान गर्ने निर्णय गरेको छ । पुरस्कारको राशि नगद एक लाख रहेको छ ।
