काठमाडौं, चैत १२ :
सत्तापक्षीय दलका शीर्ष नेताको आजको बैठकमा संघीय संसद्मा विचाराधीन विधेयकहरुलाई संसदीय प्रक्रियाबाट यथाशीघ्र टुंगोमा पुर्याउन पहल गर्ने विषयमा छलफल भएको छ ।
प्रधानमन्त्रीनिवास बालुवाटरमा भएको बैठकमा विचारधीन विधेयकलाई चाँडै अघि बढाउने विषयमा छलफल भएको हो । बैठकमा भूमिसम्बन्धी अध्यादेशमा राजनीतिक सहमति जुटाउनेलगायत समसामायिक विषयमा छलफल भएको प्रधानमन्त्री केपी ओलीको सचिवालयले जनाएको छ ।
बैठकमा प्रधानमन्त्री एवं नेकपा एमाले अध्यक्ष केपी ओली, नेपाली कांग्रेसका सभापति एवं पूर्वप्रधानमन्त्री शेरबहादुर देउवा, लोकतान्त्रिक समाजवादी पार्टी नेपालका अध्यक्ष महन्थ ठाकुर, जनमत पार्टीका अध्यक्ष सीके (चन्द्रकान्त) राउत, जनता समाजवादी पार्टीका अध्यक्ष अशोक राई, नागरिक उन्मुक्ति पार्टीका अध्यक्ष रञ्जिता श्रेष्ठलगायत सहभागी थिए ।
