एसइई धैर्यताकासाथ नआत्तिकन दिन विद्यार्थीलाई प्रधानमन्त्रीको आग्रह

आजबाट माध्यामिक शिक्षा परीक्षा (एसइई) सुरु हुँदैछ ।

प्रधानमन्त्री केपी शर्मा ओलीले एसइई धैर्यताका साथ दिन विद्यार्थीलाई आग्रह गरेका छन् ।

प्रधानमन्त्री ओलीले भिडियो सन्देश जारी गरी बिहिबारदेखि सञ्चालन हुन लागेको एसइई परीक्षामा सहभागी हुने विद्यार्थीलाई धैर्यताका साथ नआत्तिकन, राम्रो तयारी गरेर दिन आग्रह गरेका हुन् ।

“विद्यार्थी भाइबहिनीहरू आज बिहिबारदेखि एसइईको परीक्षा सुरू हुँदैछ । तपाईंहरू त्यसैको तयारीमा जुट्नु भएको छ”, प्रधानमन्त्री ओलीले सन्देशमा भनेका छन्, “त्यसकारण तपाईंहरूसँग खेर फाल्ने समय छैन । राम्रो अङ्क प्राप्त गरेर सफलतापूर्वक उत्तीर्ण हुनुहोस् । मेरो धेरै धेरै शुभकामना छ ।”

प्रधानमन्त्रीले विद्यार्थीलाई अनिँदो, थकित अवस्थामा राम्रो परीक्षा दिन गार्‍हो हुने भएकाले त्यसबाट जोगिनसमेत आग्रह गरेका छन् । उनले विद्यार्थीले धेरै परीक्षा उत्तीर्ण गरेर आइसकेको भन्दै परीक्षासँग नतर्सिन पनि आग्रह गरेका छन् ।  

“पहिले पहिले एसएसलीलाई फलामे ढोका भन्थ्ये । त्यो शब्दले पनि विद्यार्थीमा अलिकति त्रास पैदा हुन्थ्यो । तपाईंहरू परीक्षासँग नतर्सिनुहोस्,” प्रधानमन्त्रीले भनेका छन्, “परीक्षा जीवनका कदमकदम मोडमोडमा आइरहने चीज हो । धेरै परीक्षा उत्तीर्ण गरेर तपाईँहरू यहाँ आइसक्नुभएको छ ।”

प्रधानमन्त्री ओलीले अघिल्ला वर्ष एसइईको नतिजा त्यति राम्रो नभएको भन्दै यसपटक आफूले विद्यार्थीसँग राम्रो नतिजाको अपेक्षा गरेको समेत बताएका छन् ।