राष्ट्रिय स्वतन्त्र पार्टी (रास्वपा) का सभापति रवि लामिछाने आज कास्की जिल्ला अदालतमा दोस्रो तारेख बुझ्न उपस्थित भएका छन् ।
यसअघि, माघ २५ गते उनले पहिलो तारेख बुझ्न कास्की अदालतमा उपस्थित भएका थिए । पोखरास्थित सूर्यदर्शन सहकारी ठगी मुद्दामा ६५ लाख धरौटीमा रिहा भएका रवि लामिछाने अहिले विभिन्न ठगी मुद्दामा तारेख धाइरहेका छन् । लामिछाने पत्नी निकिता पौडेलसँगै आज बिहान हवाई मार्ग हुँदै पोखरा पुगेका हुन् ।
कास्की अदालतमा आज तारेख बुझेर, रवि लामिछाने सोमबार रुपन्देही जिल्ला अदालतमा उपस्थित हुनेछन् । रुपन्देहीको बुटवलस्थित सुप्रिम सहकारी ठगी मुद्दामा उनले १ करोड रुपैयाँ धरौटी बुझाएर माघ १३ गते रिहा भएका थिए । यस्तै, चितवनको सहारा सहकारी ठगीमा पनि उनले ५४ लाख रुपैयाँ धरौटी बुझाएर माघ २४ गते छुटेका थिए ।
काठमाडौंको स्वर्णलक्ष्मी सहकारी ठगी मुद्दामा पनि रवि लामिछानेविरुद्ध मुद्दा दायर भएको छ । जहाँ उनले ६० लाख रुपैयाँ धरौटी बुझाएर माघ २ गते छुटेका थिए । पर्साको सानो पाइला सहकारी ठगी मुद्दामा भने उनले हालसम्म मुद्दा दर्ता गराउन बाँकी छ । कास्की अदालतको तारेख बुझेर लामिछाने सोमबार अर्को तारेख बुझ्न रुपन्देही जाने बुझिएको छ ।
