‘एमसीसी राम्रो रहेछ भन्ने कुरा जनताले अहिले आएर बुझे’

नेपाली कांग्रेसका सभापति एवं पूर्वप्रधानमन्त्री शेरबहादुर देउवाले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) ले राम्रो भएको कुरा नागरिकले अहिले आएर बुझेको दाबी गरेका छन् ।

नेपाली कांग्रेसको आर्थिक नीति तथा योजना विभागले बुधबार आयोजना गरेको नेपालमा वैदेशिक सहयोगको अर्थ राजनीति विषयक संवाद गोष्ठीमा उनले यस्तो बताएका हुन् । उनले एमसीसी पास गराउन पनि धेरै गाह्रो भएको स्मरण गर्दै अहिले आमनागरिकले सही रहेछ भन्ने बुझेको बताए ।

उनले पास गराउने बेलामा धेरै ठुलो विरोध भए पनि अहिले आएर साँच्चिकै राम्रो रहेछ भन्ने सबैले थाहा पाएको बताए । ‘एकपटक एमसीसी पास गर्ने बेलामा, एमसीसी सही छाप गर्ने बेलामा धेरै ठुलो विरोध भयो ।  पार्लियामेन्टबाट पास गराउन पनि धेरै गाह्रो भयो,’ उनले भने, ‘अहिले सबैलाई थाहा भयो कि त्यो साँच्चिकै राम्रो रहेछ भनेर । यसले नेपाललाई फाइदै गरेको छ । हानि गरेको छैन भनेर । यो ग्रान्टमा आएको हो, ऋणमा आएको होइन । त्यसले अहिले फाइदा गरिरहेको छ भन्नेकुरा सबैले देखे । राम्रो गरेको छ ।’

व्यापार गर्ने र उद्योग खोल्ने काम सरकारको नभएको भन्दै व्यापार व्यापारीले र उद्योग उद्योगपतिले नै खोल्ने सभापति देउवाको भनाइ छ । ‘व्यापार गर्ने व्यापारीले नै हो, उद्योग खोल्ने उद्योगपतिले नै हो । सरकारले उद्योगपति र व्यापारी बन्ने कुरा पनि छैन । हाम्रो देश भारत र चीनको बीचमा छ । त्यसको असर पनि हामीलाई पर्छ । प्रभावहरु हाम्रोमा पर्छन्,’ उनले भने ।

सभापति देउवाले कुनै देशको ऋण लिँदा पनि ऋणको भारमा नपर्ने गरी लिनुपर्ने धारणा राखे ।